طريقة تحضير مكرونة نجرسكو

صنف جديد ده يا أميرة يا بنتى؟! أيوه يا طنط "نجرسكو".. نجرسكو؟! أيوه مكرونة بالفراخ.. يمكن يا بنتى!! ههههههههههههه من المشاهد الكوميدية فى الأفلام الأبيض والأسود اللى مش ممكن تتنسى أبدا.. منظر العروسة الجديدة اللى اتدبست فى عزومة وهى مبتعرفش تطبخ، وحبت تجتهد خربت منها خاااااااالص.. ومن الأصناف دى كانت المكرونة النجرسكو.. مكرونة بالفراخ يا طنط.. فى المشهد كانوا حاطين على السفرة فرخة كبيرة، وجايبين مكرونة سباجتى مش مسلوقة ومرشقينها فى لحم الفرخة.. منظر مُفزع الصراحة.. فريق العمل أبدع بصراحة فى تصوير المكرونة النجرسكو عشان ينقلنا لمعنى مهم إن العروسة دى مش بتعرف تطبخ وملهاش فيها.. قبل مشهد السفرة المفرودة بالأصناف، كانوا جايبين العروسة واقفة فى المطبخ فاتحة كتاب وصفات للأكل وعمالة تتعلم منها طريقة سهلة لعمل مكرونة نجرسكو وغيرها طبعا من الأصناف اللى قررت تعملها فى العزومة، بس على ما يبدو وقتها إن الوصفة اللى اعتمدت عليها من الكتاب المجهول ده كانت مش قد كده، أو العروسة بقى اللى فهمها ضعيف، المهم إن الطبخة باظت والوصفة قلشت والعزومة بقت مأساة!

فى أسئلة بلاحظ دايما السيدات بيسألوها بنفس الطريقة، يعنى مستخدمين عبارات ثابتة فى أغلب الأسئلة اللى تُخص الطبخ أو الوصفات، بلاحظ دايما كلمتين ثابتين هم: (وصفة سهلة، ومتجربة)، أى واحدة بتتعلم تعمل صنف جديد عليها مسبقش عملته قبل كده بتفكر فى إن الوصفة تكون سهلة، هى تقصد بكلمة سهلة يعنى طريقة شرح الوصفة سهلة، وبالتالى تبقى سهلة عليها كست بيت إنها تنفذها من غير ما تخاف تبوظ منها، وكلمة "متجربة" يعنى تكون اللى بتقول لها الوصفة وبتشرح لها طريقة عمل صنف ما، تكون هى نفسها عملتها قبل كده، عشان اللى بتسأل تبقى مطمنة إنها مش بتوصف من الخيال وبالتالى ساعة التنفيذ ممكن الوضع يتغير وبالتالى ممكن الطبخة تبوظ على أهون سبب، وتبقى ست البيت خسرت وقتها والمكونات اللى حطيتها فى الأكل، بس أكتر حاجة بتكون خسرتها لما يدخل الإحساس البايخ بتاع "الفشل" عليها وتقعد تشعر بتأنيب الضمير إنها عملت وصفة وباظت منها! الوصفة بتاعتنا النهاردة متوفر فيها البندين طريقة سهلة لعمل مكرونة نجرسكو وفى نفس الوقت طريقة متجربة، يعنى عملناها قبل كده وعارفين تكاتها وحركاتها، وازاى كمان تطلع من تحت ايدك مميزة جدا كأنك شيف متحرف وعملتيها فى أشهر المطاعم.. المكرونة النجرسكو فيها شبه كبير جدا من المكرونة بالبشاميل، يعنى طبقات ولبن وكريمة ومكرونة penne ووش متحمر، وجبنة على الوش، الشبه فعلا بينهم كبير، بس فى المكرونة بالبشاميل بيبقى الحشو لحمة مفرومة أما فى المكرونة النجرسكو الحشو بيكون قطع فراخ، وبعض الاختلافات التانية فى الوصفة هنقولها بالتفصيل فى طريقة التحضير. يلا بينا مع بعضنا نتعرف على مكونات الطاجن الرهيب ده وطريقة تحضيره.

طريقة تحضير مكرونة نجرسكو

المكونات:

أولاً: مكونات الحشو.
صدور دجاج مخلية من العظم
ربع بصلة مفرومة

2 فص ثوم مفروم
1/2 ملعقة شاى ملح

1/4 ملعقة شاى فلفل أسود مطحون

رشة زنجبيل بودرة

عصير ليمونة

ملعقة طعام زيت الزيتون

شرائح مشروم طازجة (حسب الرغبة)
شرائح زيتون أسود (حسب الرغبة)

ثانياً: مكونات الصوص الأبيض:
3 ملاعق طعام زبدة ذائبة
ملعقة طعام دقيق (طحين)
لبن (حليب)

كريمة طهى
ملح + فلفل أسود مطحون

ثالثاً: المكرونة.
250 جم مكرونة قلم penne
رشة ملح

رابعا: طبقة الجبن

50 جرام جبنة موتزاريلا

50 جرام جبنة شلل

50 جرام جبنة حلوم

طريقة التحضير:

أولا: الحشو.

يتم تحضير صدور الدجاج بتتبيلها لمدة ساعة إلى ساعتين، وذلك بعد غسلها وتصفيتها تماما من الماء الزائد، حيث نقوم بإضافة الملح والفلفل الأسود والزنجبيل بالنسب المذكورة في المكونات، ثم نضيف البصل المفروم وعصير الليمون ونقلب قطع الدجاج فيها جيدا حتى تتشرب كل المكونات بالتساوى، وندخلها الثلاجة (البراد) لمدة لا تقل عن ساعة.

بعد فترة التتبيل، نستخرج صدور الدجاج ونتركها في درجة حرارة الغرفة حوالى ربع ساعة، ثم نقوم بتقطيعها في صورة شرائح طولية أو مكعبات حسب الرغبة لنبدأ في تسويتها.

فى مقلاة مناسبة وعلى نار متوسطة نضع ملعقة طعام من زيت الزيتون، ثم نضيف الثوم المفروم ونُقلبه جيدا حتى يصفر قليلا، ثم نُضيف شرائح المشروم ونقلبه معها جيدا، ثم نُضيف شرائح الدجاج ونُقلبها جيدا حتى تصل لدرجة التسوية، ونُراعى أن يتم تقليب شرائح أو مُكعبات الدجاج على جميع الجوانب حتى تكون التسوية كاملة.

نرفع شرائح الدجاج والمشروم من على النار ونتركها جانبا لتبرد.

ثانيا: تحضير الصوص الأبيض.

يتم وضع الزبدة فى وعاء ويضاف إليها الدقيق (الطحين)، ثم يتم خلطهما سوياً حتى تمام الامتزاج، بحيث يتحول لون الدقيق (الطحين) إلى اللون الذهبى الفاتح.

يضاف اللبن تدريجياً مع التقليب المستمر حتى نحصل على قوام لبانى سائل ثم يضاف الملح والفلفل.

تُقلب المكونات جيدا، ثم تُضاف كريمة الطهى إلى الخليط السابق لتُكسب الصوص الطعم الجميل والقوام اللبانى السائل اللذيذ. ويُراعى في هذه الخطوة أن يكون الخليط متوسط التماسك، أى ليس سميكا ولا سائلا كالماء.

ثالثا: المكرونة.

أثناء تحضير الصوص الأبيض، نبدأ في إعداد المكرونة وذلك بتجهيز وعاء عميق ووضع 2 لتر من الماء به، ورشة ملح، ونغطى الوعاء ونتركه على نار متوسطة إلى مرتفعة حتى يصل الماء لدرجة الغليان.

نرفع الغطاء ونضع المكرونة فى الماء المغلى مع التقليب الجيد المستمر، ويُراعى خفض درجة الحرارة إلى درجة متوسطة هادئة.

نُبقى على المكرونة في الوعاء مدة 7 دقائق، ثم نرفعها من على النار ونغمرها بالماء البارد من الصنبور.

نقوم بتقسيم كمية المكرونة إلى جزئين متساويين، ونخلط كل جزء منهما بالصوص الأبيض، ثم نضع كمية منهما في أرضية الطاجن المناسب.

بعد رص طبقة المكرونة الأولى في الطاجن، نقوم بوضع الحشو الذى أعددناه من شرائح الدجاج والمشروم، ونضيف إليها شرائح الزيتون، ويجب أن نُراعى عدم إضافة شرائح الزيتون للحشوة أثناء تحضيرها على النار، حتى لا يتسبب في إكساب شرائح الدجاج طعم المرارة، لذلك تتم إضافته في الطاجن مباشرة.

نعمل بعد ذلك على إضافة طبقة أخرى من المكرونة، ثم تُغطى جميع الطبقات بالصوص الأبيض.

على نار هادئة وفى وعاء عميق، نقوم بوضع خليط الأجبان (الموتزاريلا، الشلل الحلوم) ثم نُضيف إلأيها القليل جدا من اللبن (الحليب) ونبدأ في تقليبها جيدا وبسرعة على النار، حتى تبدأ في الوصول للحالة الذائبة، وبعد ذوبانها نقوم بإضافتها كطبقة نهائية على طاجن المكرونة النجرسكو.

يتم إدخال الطاجن إلى الفرن الساخن، على درجة 180°م، ويُترك داخل الفرن لمدة ثلث ساعة، ثم يوضع الطاجن تحت الشواية مدة 5 دقائق ليتم تحمير الطبقة الأخيرة.

ملحوظة مُهمة جدا:

الأجبان المستخدمة بها نسبة عالية من الملح، لذلك يجب عدم الإفراط في استخدام الملح مع المكرونة أو الحشوة.

دى كانت وصفتنا النهاردة لعشاق المكرونة النجرسكو، وبالنسبة لأصناف الجبنة أنا بشتريها من محلات السوريين اللى موجودة في مدينة 6 أكتوبر، لو عاوزين تشتروها دوروا على أقرب محل أجبان للإخوة السوريين هتلاقوا طلبكم، وبجد الأجبان طعمها جنان، جربوا إحساس الجبنة اللى فعلا بتمط وتشد معاكوا لغاية سقف الأوضة، إحساس رهيب، وبألف هنا.