آحدث المقالات

طريقة تحضير مشروب الكركديه

طريقة تحضير مشروب الكركديه:

المكونات:
كوب من الكركديه الجاف
2 كوب ونصف ماء
3-5 ملاعق كبيرة سكر (حسب الرغبة)

طريقة التحضير:

اولا نقوم بنقع أوراق الكركديه الجافة حيث نضعها فى دورق ونغمرها بالماء ونتركها فى الثلاجة مدة يوم كامل ثم نخرجها باردة ونصفيها من الأوراق ونضع السكر حسب الرغبة، ونقلب السكر جيدا حتى تمام الذوبان وتقدم باردة.

بعد ما عملنا لكم وصفة مشروب الكركديه، تفتكروا إننا شجعناكم تعملوه فى البيت بدل ما تشتروه من بره؟ 

طيب تفتكروا إنكم هتجربوها؟! لو جربتوا وصفتنا قولوا لنا رأيكم فيها فى تعليق عشان نفضل على تواصل دائم معاكم.. وبالهنا.

0

طريقة تحضير سموزى البطيخ

أنا مخبيش عليكم كنت مدمنة بيبسى، بشربه فى كل وقت وأى وقت، لو فتحت التلاجة ملقتش قدامى ازازة يركبنى العفريت، وامشى فى البيت زى المجنونة بدور على الموبايل عشان أعمل أوردر من السوبر ماركت وأنوع فى الطلب بتاعى يعنى آخد لتر بلاستيك، ولتر تانى بلاستيك بردو... ههههههه أصل الإزازة لما بتبقى أكتر من لتر وتتفتح كذا مرة، الصودا بتروح منها!
الحقيقة كل المشروبات الغازية مضرة بالصحة، منها اللى بيأثر على العظام وبيسبب الهشاشاة، ومنها اللى بيسبب ارتفاع السكر فى الدم، وأضرار تانية كتيرة، تقدروا تتعرفوا عليها بالتفصيل من خلال الرابط ده 
مهم لصحتنا جدا إننا نشرب عصاير كتير، ومتنوعة، ومهم اكتر تكون معمولة فى البيت، عشان تكون خالية تماما من أى مواد حافظة، ويكون أصلها ومصدرها كفواكه معروف بالنسبة لنا، مهم جدا لأطفالنا إنهم يشربوا عصير صحى ينفع أجسامهم مش يضرها، اعملوا العصير فى البيت يا جماعة واهتموا جدا بصحتكم وصحة أولادكم، بلاش عصير مُعلب تانى! تعالوا نتعرف مع بعض على فوائد الفواكه اللى هنستخدمها النهاردة فى العصير بتاعنا.
ومن أجمل فواكه فصل الصيف، وأكترها تفضيلا للمصريين، فاكهة البطيخ، خصوصا لأنها مليانة بالعصارة اللى بتساعد على ترطيب الجسم فى جو الصيف الحار جدا، وعشان كده هنتعلم مع بعض طريقة تحضير سموزى البطيخ اللى مش بتاخد وقت خالص ولا محتاجة مجهود.

طريقة تحضير سموزى البطيخ:

المكونات:
4 شرائح بطيخ أحمر مثلثة 
1-2 ملعقة طعام سكر (حسب حلاوة قطع البطيخ)
ربع كوب ماء مُثلج أو بارد

طريقة التحضير: 

نقوم بخلى شرائح البطيخ من البذور، ونقطع القشرة ثم نضعه فى كيس ونحكم غلقه، ثم ندخله الفريزر لمدة ساعتين على الأقل أو حتى يتجمد.
نستخرج شرائح البطيخ من الفريزر ونضعها فى الخلاط، ونضيف إليها السكر والماء ونقوم بخلطها جيدا حتى تمتزج جميع المكونات، ثم تقدم.
يمكن تزيين أكواب العصير بقطع من فاكهة البطيخ الطازجة أو بأوراق من النعناع الطازج.
جربوها النتيجة وهمية بجد، وعيشوا الانتعاش الصحى والطبيعى، وبالهنا.

0

طريقة تحضير سلطة المشروم بصوص الليمون

السلطة بالنسبة لى شئ مهم جدا على ترابيزة السفرة فى وجبة الغدا، ومهم بردو لو فى حفلة شواء، أو عاملة عزومة، الأكل من غير سلطة ناقصه دايما حاجة، ومهم نهتم بفقرة السلطة دى لأنها بتفتح النفس وبردو بتساعد على الشبع السريع، وده مهم خصوصا لمرضى السكر، مهم جدا يأكلوا سلطة كتير خصوصا السلطة الخضرا، ويلاقوها دايما على السفرة لأنها بتملى البطن وده يساعدهم على التقليل من كميات النشويات التانية اللى ممكن فى غير وجود السلطة ياكلوا منها كتير وتضرهم. ولأن السلطة طبق مهم وحيوى على سفرة الغدا، فبنحاول باستمرار نقدم أصناف كتيرة وأشكال مختلفة لطبق السلطة فى موقعنا، فيها أصناف فعليا تنفع إنها تكون وجبة متكاملة ومشبعة، وفيها أصناف تانية ممكن تكون عشاء جميل، أو تصبيرة لذيذة، والنهاردة هنتعرف على طريقة تحضير سلطة المشروم بصوص الليمون الغنية بالفوايد والفيتامينات، الوصفة دى من ابتكار دكتورة إيمان، يعني حصريا لجوا الحلة، لأن فريق العمل بيحاول باستمرار يطور نفسه وأفكاره وبالتالى وصفاته، وده اللى هتلاقوه فى الوصفة الخطيرة اللى بنقدمها لكم النهاردة، وهى طريقة تحضير سلطة المشروم بصوص الليمون.

طريقة تحضير سلطة المشروم بصوص الليمون:

المكونات:

150 جرام مشروم طازج
حبة طماطم طازجة
2 ملعقة طعام بقدونس طازج
20 جرام جبنة موتزريلا مبشورة

لصوص الليمون:
عصير ليمونة
بشر ليمونة
3 ملاعق طعام زيت زيتون
ملح + فلفل أسود

طريقة التحضير:

تُخلط مكونات الصوص مع بعضها بإذافة عصير الليمون وزيت الزيتون وربع ملعقة شاى ملح وربع ملعقة شاى فلف أسود مطحون، فى طبق ويتم تقليب المكونات جيدا حتى تمام امتزاجها ببعضها البعض، ثم تترك جانبا. 
للسلطة: يتم تقطيع قطعة الطماطم فى صورة شرائح دائرية متساوية مع تقطيع حبات المشورم، وتقطيع البقدونس لقطع صغيرة بشكل متساوٍ. 
على نار متوسطة، نضع مقلاة، ونتركها تسخن قليلا، ثم نضيف إليها ربع ملعقة طعام من زيت الزيتون، ثم نضع قطع المشورم، ونبدأ فى تشويحها لمدة دقيقتين، بعدها تُرفع قطع المشروم من على النار وتتر جانبا لتبرد. 
فى طبق تقديم مناسب، تضاف شرائح الطماطم المقطعة، والقدونس، والمشروم، والجبنة الموتزريلا المبشورة، وتقلب جميع المكونات جيدا، ثم نقوم بإضافة الصوص الذى قمنا بتجهيزه ونعمل على خلطه جيدا مع المكونات السابقة، ثم يُقدم. 
يتم تزيين طبق السلطة برش البقدونس الطازج، وتُقدم على سفرة الطعام.
أتمنى الوصفة تكون سهلة وتكون عجبتكم، الصوص أو الـ dressing اللى بيتعمل فى أى سلطة هو اللى بيخليها ليها طعم مميز وشهى، اهتموا جدا بعمل الصوصات الخاصة بأنواع السلطة المختلفة عشان تحققوا طعم أشهى للأكل، وبالهنا. 




0

 طريقة تحضير بسكويت توك المملح:

مين فينا مبيحبش البسكوت خصوصا لما يبقى دايب ومقرمش وبيفرفت فرافيت
وياسلام لو معمول فى البيت، عارفين بسكوت (توك) البسكوت المملح عملناه فى البيت وطلع أحلى من بتاع بره، تعالوا نتعلم طريقة تحضير بسكويت توك المملح، وندخل بقى على المقادير والمكونات.

طريقة تحضير بسكويت توك المملح:

المكونات:
كوب جبنة فيتا
نصف كوب زيت
نصف كوب زبدة طرية
١ بيضة
نصف كوب نشا
٤ أكواب دقيق (طحين)
ملعقة صغيرة ثوم بودر
٣ ملاعق صغيرة جبن رومى مطحون ناعم
نصف ملعقة صغيرة ملح
ملعقة صغيرة بيكينج بودر
ربع ملعقة صغيرة بيكربونات صوديوم (بيكينج صودا)

طريقة التحضير:
في وعاء عميق، يتم إضافة كل المكونات الآتية (الزيت، والزبدة، والجبنة والبيض)، وبواسطة مضرب سلك يدوى، نقوم بخلطها مع بعضها.
نُضيف بعد ذلك المكونات الآتية (النشا، والدقيق والملح، والبيكينج صودا، والبيكينج بودر)، ونقوم بعملة عجن المكونات كلها مع بعضها البعض حتى يُصبح العجين متماسكا.
نترك العجين يرتاح فترة 10 دقائق.
بعدها نبدأ في فرد العجين وتشكيله، حيث نفردها بين ورقتين زبدة، أو بين كيسين بلاستيك، مع مُراعاة أن يكون ارتفاع العجين 1 سم تقريبا.
نقطع العجين، باستخدام سكين مناسب، على شكل مربعات متساوية الحجم، وبواسطة شوكة او خلة أسنان، نبدأ في تخريم العجين.
نقوم بتسخين الفرن على درجة حرارة 180°م، لمدة ربع ساعة، بعدها ندخل العجين في الفرن ونتركه حتى يحمر من أسفل وأعلى.
نخرج البسكويت ونتركه يبرد، ثم يُقدم.
على فكرة الوصفة دى ناجحة جدا وطعمها أحلى من اللى بنشتريه من المحلات.. جربوها، وبالهنا.

0

 طريقة تحضير المَنسَف الأردني

المَنسَف من أشهر الوجبات اللى اتعرفت زمان فى منطقة بادية الشام، فى المنطقة بين سوريا والعراق، والأردن وفلسطين.. وهى عبارة عن فتة لحم ضانى بالخبز واللبن والأرز.. اشتهرت دول الأردن وفلسطين جدا بطريقة تحضير المَنسَف، فتلاقيه فى فلسطين، طبق شعبي مرتبط بفترات الزواج واحتفالات الأعراس، أما فى الأردن فيعتبر الطبق الوطني الرئيسي هناك.. طريقة تحضير المَنسَف الأردني لتعتمد أساسا على استخدام لبن الجميد، اللى بيتم تصنيعه من الحليب، بعد تحويله إلى لبن رائب.. الفكرة الأساسية فى طريقة تحضير المَنسَف الأردني هى الاعتماد على اللبن، مش أى لبن، لبن الجميد، يعنى هو المكون الأساسى فى الوصفة..

 لو عاوزين تعرفوا معلومات أكتر عن طريقة تحضير المَنسَف الأردني ... اضغـــــــط هنــــــــــــــا

طريقة تحضير المَنسَف الأردني: 

المكونات:
لحمة خروف 2 كيلو (أو حسب أفراد العائلة)
كيلو ونصف أرز
1/2 كيلو راس جميد
علبة شنينة
سمنة بلدية
بصلة 
ورق غار
خبز شراك
لوز
صنوبر
ملعقة صغيرة كركم

طريقة التحضير:
ينقع الأرز بالماء مع ملعقة كركم.
نضع اللحم بطنجرة كبيرة ونغمرها بالماء ونزيل الريم الذي يخرج من اللحمة ثم نضع البصل المقطع مع ورق غار ونتركها حتى تستوي 1\2 استواء.
ننقع الجميد المكسر بماء ساخن ثم نضعه بالخلاط ونخفقه ثم نصفيه بالمصفاة 
ونضع كوبين من اللبن الشنينة ونخلطهم جيدا، ثم نضيف اللبن على اللحم ونتركها حتى يستوي اللحم كامل الاستواء.
يصفى الأرز ثم نقلبه بالسمنة البلدية على النار، وأنا بضع بهارات خاصة للمنسف والماء، ونتركه حتى الاستواء جيدا.

طريقة التقديم:
نفرد رغيفين من خبز الشراك بالصدر ونشربه من لبن الجميد المصفى، ثم نضع الأرز ونزينه باللوز والصنوبر وقليل من البقدونس، ثم نضع اللحم القطع ونشرب بكوبين من اللبن ويزين باللوز والصنوبر، ويقدم بجانبه اللبن المصفى.
دى كانت وصفتنا من عمل وتقديم وتصوير شيف حليمة الشيخة، وهى طريقة تحضير المَنسَف الأردني، يا رب تكون عجبتكوا، استمتعوا بالتغيير واتعلموا معانا وصفات من المطابخ العربية، وبالهنا.

0

طريقة تحضير المعمولة الشرقاوي:


تمتاز كل محافظة من محافظات مصر المختلفة، ببعض الأكلات التى تتفنن فى إعدادها، ومن بين تلك الوصفات التى تميز محافظة الشرقية، حلوى المعمولة.. طريقة تحضير المعمولة الشرقاوي سهلة جدا، كل ما علينا إننا نتعرف على المكونات وطريقة التحضير، عشان نعمل أحلى معمولة فى الدنيا بإيدينا فى بيوتنا، يلا بينا نتعرف على طريقة تحضير المعمولة الشرقاوي، واللى بالمناسبة بتكون وصفة هايلة جدا فى فصل الشتاء، لأنها بتدى طاقة كبيرة وتعمل تدفئة رهيبة للجسم.

طريقة تحضير المعمولة الشرقاوي:
المكونات:

٤كوب دقيق
كوب إلا ربع زيت
ملعقة كبيرة خميرة
2 ملعقة سكر
2 ملعقة لبن بودرة
مياه دافئة
مقادير الحشو:
٢كوب دقيق سميد
تلت كوب زيت
نص كوب سكر
٣ملاعق كبيرة قرفة

طريقة التحضير:
نخلط المقادير الجافة مع بعضها وهى (دقيق وسكر وخميره ولبن بودر) ثم نبسهم بالزيت.
نبدأ بالعجن بالمياه الدافئة، ونستمر بالعجن، حتى يصبح العجين متجانسا ولا يلتصق باليد.
نترك العجين يخمر تقريبا نصف ساعة في جو دافئ.
تحضير الحشوة:
نخلط دقيق السميد والسكر والقرفة مع بعضهم فى وعاء عميق أو بولة عميق، ونعجنهم بالزيت.
طريقة التسوية:
نقسم العجين بعد التخمر إلى نصفين، نضع النصف الأول من العجين فى أرضية صينية مُناسبة مدهونة بالزيت، ثم نضع فوقها الحشو ثم نغطي الحشو بالنصف الثاني من العجين.
ندهن العجين من أعلى ببيضة مخفوقة بالفانيليا والقرفة ونرش سمسم للتزيين.
تدخل فرن ساخن علي الرف الأوسط ونار متوسطة لحين التسوية واحمرار الوجه.
تخرج من الفرن نسقيها شربات ثقيل وبارد، وتقدم.

لمعرفة طريقة تحضير الشربات اضغط هنــــــــــــا

نتمنى تكون الوصفة عجبتكم.. جربوها لأنها لذيذة جدا وبتشبع جدا وبتدى إحساس حلو بالدفا خصوصا فى برد الشتاء القارس.. وبالهنا.

0

طريقة تحضير الخُبيزة:
  
الله يعطينا ويعطيكم العمر ان شاء الله هنتعلم طريقة تحضير الخُبيزة، وهي طريقة امي الله يرحمها ويجعلها بميزان حسناتها علمتيني اياها بكل حب وعطاء.. الخُبيزة  
أكلة فلسطينية شهيرة بطريقتها بالعجين المفلفل وكمان وصفة خبيزة مقلية بالبصل الوصفتين طيبين وبيشهو ولكثرة فوائدها بحب أطبخها طول موسمها لأنى بحبها وبعشقها.. تعالوا نتعلم طريقة تحضير الخُبيزة بالوصفة الفلسطينية، مقدمة من شيف حليمة الشيخة.

طريقة تحضير الخُبيزة: 

المكونات:
ضمة أو ضمتين من الخبيزة الطازجة
بصل 
زيت زيتون
طحين قمح أو طحين عادي
ملح وفلفل وشطة حمراء
قرن فلفل احمر مفروم
ماء للسلق

طريقة التحضير:

تقطف أوراق الخبيزة دون السيقان، ثم يغلى الماء وتسقط اوراق الخبيزة في الماء وتحرك إلى أن يتم استوائها.
ثم يحضر المفراك وهو عبارة عن عصا خشبية يوجد بها عدة ثقوب يخرج من تلك الثقوب أعواد خشبية صغيرة وتحرك الخبيزة بواسطته يمينا وشمالاً، ويمكن استخدام خفاقة البيض في الوقت الحالي تؤدي نفس الغرض، ممكن الاستغناء عن المفراك والخفاقة ونكتفي بتحريكها بملعقة خشبية.
بعد أن تذوب الخبيزة وتتفكك أوراقها، يوضع القليل من الماء على الدقيق وتحرك حتى يتكون كتلاً من العجين الصغيرة.
توضع على الخبيزة المطبوخة وتتبل بالملح والفلفل الأسود ونضع الفلفل الأحمر المفروم وملعقة الشطة الحمراء، وتترك على نار هادئة إلى أن يتم تسوية العجين.
يقطع البصل ويقلى بزيت الزيتون إلى أن يحمر، ومن ثم يضاف خليط البصل والزيت إلى الخبيزة ويطبخ قليلاً.
يقدم ساخناً مع الخبز الطازج والليمون والشطة وصحتين وعافية.

دى كانت وصفتنا من عمل وتقديم وتصوير شيف حليمة الشيخة، وهى طريقة تحضيرالخُبيزة الفلسطينية، يا رب تكون عجبتكوا، استمتعوا بالتغيير واتعلموا معانا وصفات من المطابخ العربية، وبالهنا.

0


طريقة تحضير معمول السميد بالعجوة:


مساكم كله خير وبركة يارب..معمول السميد بالعجوة والفستق من أجمل حلويات العيد بالنسبالي، طعمه حقيقى روعة، وممكن معمول السميد يتعمل بالعجوة(معجون التمر) أو بالفستق، طريقة تحضير معمول السميد بالعجوة، سهلة جدا، تعالوا نتعرف عليها مع بعض.

طريقة تحضير معمول السميد بالعجوة:

المكونات:
٥٠٠ جرام دقيق سميد ناعم.
١٥٠جرام سمن مذاب أو زبدة مذابة.
١/٢كوب زيت ذرة.
١ و ١/٢ كوب دقيق.
١/٢كوب حليب بودرة.
١كوب سكر بودرة.
١ملعقة صغيرة محلب+١/٤ملعقة صغيرة جوزة الطيب.
١/٢ملعقة صغيرة بيكنج بودر.
رشة ملح.
١/٢كوب حليب سائل.
مكونات خليط الخميرة:
١ ملعقة صغيرة سكر+١/٤كوب ماء+ملعقة صغيرة خميرة فورية.
٢ملعقة صغيرة فانيليا.
١/٤كوب ماء ورد.

طريقة التحضير:
يبس السميد مع الزبدة أو السمن المذاب جيدا ويتركوا ليلة كاملة.
تخلط مكونات الخميرة مع بعض ويتركوا جانبا يخمروا عشر دقائق حتى تظهر رغاوي على الوجه.
يضاف على خليط السميد والسمن الدقيق والحليب البودرة والسكر البودرة والمحلب وجوزة الطيب والبيكنج بودر ورشة الملح ويخلطوا جيدا باليد.
ثم يضاف الحليب السائل والفانيليا وخليط الخميرة وماء الورد وتلم العجين باليد جيدا دون العجن ويترك العجين يخمر ساعة.
يشكلوا على شكل كرات وتحضر الحشوة على شكل كرات أصغر وتحشى بها.

طريقة تحضير الحشوة:
نصف كيلو معجون تمر (عجوة) يعجنوا باليد مع ملعقتين كبار زيت وأي منكه طعم تفضلوه (حبهان أو قرفة أو شمر) حتى تصبح طرية وتشكل على هيئة كرات.
٢٥٠ جرام فستق مطحون يعجن ٥ملاعق كبيرة سكر بودرة أو ملعقتين عسل نحل و٣ملاعق كبار ماء ورد يعجنوا ويشكلوا على هيئة كرات.
يخبز في فرن محمي على٢٠٠°م من ١٠ إلى ١٥ دقيقة حتى يأخذ لونا ذهبيا خفيفا من أسفل وأعلى
يستخرج ويتك حتى يبرد، ثم يُقدم فى أطباق الحلوى، وكل عام وأنتم بألف خير.
عيد فطر سعيد على حضراتكم وعلى كل المة الإسلامية، استمتعوا بصناعة معمول السميد فى البيت، وشاركوا الوصفة مع غيركم من الناس عشان الكل يستفيد، وبالهنا.

0
© Gowael7alla Team Eman & Israa 2017. Powered by Blogger.