الترمس الحلو

عُمركم حسيتوا إن فى رابط قوى بينكم وبين الأكل؟ كأنه مثلا صديق أو رفيق؟! الأكل فى حياتنا زى أى علاقة، ممكن يكون صديق مخلص، أو صديق سيئ. فى صديق مهما الظروف شغلتكوا عن بعض بتفضل فاكرة بكل خير، ولما بترجعوا تتجمعوا تانى بتكون فى منتهى السعادة، بتنسى فترات انشغالكم عن بعض، وبتفتكر اللحظات اللى جمعتكم كتير قبل كده.

الأكل زى الصديق أو الرفيق، خصوصا لو كان مُحبب بالنسبة لنا، مهما غابت عننا أكلة بنحبها ومكنش سهل نعملها أو نلاقيها، لما بتيجى فرصة ناكلها فيها، بنفرح وبنسترجع العلاقة القوية اللى بيننا وبين الأكلة دى.

ليا أصدقاء وأقارب كتير عايشين برا مصر، كلهم قبل ما بينزلوا اجازات بيعملوا مكالمة يطلبوا فيها الأصناف اللى بيحبوها، المكالمة دة تقريبا مقدسة عند المغتربين، وحتى إذا المغترب معملش هو المكالمة دى، حبايبه اللى فى مصر همه اللى بيعملوها، تلاقى مراته أو أمه أو صحابه بيكلموه ويسألوه: "نفسك تاكل إيه يا معلم؟ نفسك تروح فين في مصر لما توصل؟"

حتى فى فترات السفر البسيطة اللى بغرض الفسحة، حتى لو جوا مصر، تلاقى الواحد بيشتاق لأكل البيت، أو بيشتاق لأكلة معينة، ولو كانت الفسحة برا مصر، حُبنا واشتياقنا للأكل المصرى بيزيد جدا.

ساعات الواحد بتوحشه أكلة معينة فى وقت مش وقتها، يعنى تشتاق للمانجة فى عز الشتاء، أو تبقى نازل فى فندق 7 نجوم، وتشتهى ساندوتش كبده من على عربية فى الشارع، النفس بتروح ساعات لحاجات مش فى أوانها، بتتمناها وبس، سواء ينفع ده يحصل أو لأ، حاجة كده شبه الوَحَم عند المرأة الحامل.

أنا وكل اخواتى مرتبطين بحاجات فى الأكل، أشهرها فى حياتنا، الترمس! ياااااااه يا عبد الصمد لو دخلت علينا بطبق ترمس معصور عليه ليمون ومتحوج بالكمون والشطة، تبقى ليلة الهنا والسعد والمُنى، من حبنا فى الترمس ممكن نضرب كيلو فى ساعة. يا ترى انتوا إيه الأكلة اللى مرتبطين بيها؟!

الترمس مش مجرد طبق تسالى، الترمس كمان جو عام، يعنى لما تكون ماشى على كورنيش النيل، لازم تلاقى بياعين الترمس واقفين بعربياتهم هناك، وفارشين كراسى وترابيزات، كأن النيل والهوا الجميل، عازين تظبيطة دماغ، بطبق ترمس، بكوباية شاى بالنعناع، أو كوباية حمص الشام "حلبسة"، المهم تعمل لنفسك المود الصح. حتى فى المصايف، تلاقى الترمس ديما على كورنيش اسكندرية وغيرها من المدن الساحلية، الترمس والميه أصحاب مينفعش واحد فيهم من غير التانى.

الترمس له فوايد صحية وغذائية ملهاش حصر، وهنتعرف عليها سوا عشان نستفيد من الفوايد دى ميبقاش مجرد أكلة للتسلية والسلام.

فوائد الترمس:

يحتوي الترمس على مادة “الليسيتين” المكونة من الكالسيوم والفوسفور وهو من أكثر الحبوب التي تحتوي على هذه المادة. تستخدم هذه المادة كمقوي للأعصـاب ومنشط للجسم وللأعصاب المرتخية وتعمل مادة الليسيتينين كمنبـه للقلب.

يعتبر الترمس من أغنى الحبوب بالألياف حيث تعمل هذه الألياف على التقليل من امتصاص الجسم للجلوكوز الناتج عن تحلل النشويات والسكريات، مما يقلل من ارتفاع مستوى السكر بالدم، وكما تقلل الألياف من ارتفاع مستــوى الكوليسترول.

يستخدم الترمس كمـدر للبــول.

يستخدم الترمس كمضاد لبعض الأمراض الجلدية مثل الأكزيمــا والصدفيــة والكلف والحروق والبثور السوداء المنتشرة في الوجه.

يستعمل الترمس لعلاج ألام المفاصل وفي علاج الطحال والكبد.

يساعــد الترمس في علاج الإمساك والتخلـص من الديــدان في الجسم.

يخلط الترمس مع الشعير لتخفيف آلام المفاصل ويفتح سدد الطحال والكبد.

طريقة عمل الترمس الحلو:

المكونات:

1 كيلو ترمس حلو

ملح

ماء

طريقة التحضير:

يتم غسل الترمس جيدا بالماء الجارى للتأكد من عدم وجود أى شوائب به.

يُنقع الترمس فى وعاء عميق به كمية كبيرة من الماء، بحيث تُغطى كمية الماء الترمس وتزيد عنه بنصف لتر على الأقل.

يُترك الترمس مُدة 24 ساعة على الأقل داخل ماء النقع، وذلك حتى تنتفخ حباته.

يتم تغيير الماء الذى تم نقع الترمس به، ويُوضع ماء جديد يُغطى كمية الترمس ويزيد عليه بنصف لتر على الأقل.

يُوضع الوعاء المحتوى على الترمس والماء على نار متوسطة، ويترك حتى يصل لمرحلة قريبة من التسوية.

يُضاف الملح حسب الرغبة، ثم يُترك الترمس ليصل إلى تمام التسوية.

يُرفع الترمس من على النار ويُترك فى ماء الوعاء حتى يبرد.

يُراعى عدم تغيير الماء حتى لا يفقد الترمس طراوته.

يُقدم الترمس مع الكمون والشطة والليمون حسب الرغبة.